ԱՎԵԼԻՆ

Հասարակական

Հայ ծրագրավորողներն ախտորոշիչ որոշումներին աջակցող արհեստական բանականության համակարգ են ներկայացրել
21:00 14.02.2019

Հայ ծրագրավորողներն ախտորոշիչ որոշումներին աջակցող արհեստական բանականության համակարգ են ներկայացրել

Հայ ծրագրավորողները մասնակցում են ԱՄՆ Ֆլորիդա նահանգում փետրվարի 11-15-ն  անցկացվող HIMSS19  Health IT Conference (առողջապահության ոլորտի տեղեկատվական տեխնոլոգիաներ) խոշորագույն միջազգային  համաժողովին, որտեղ համաշխարհային առաջատար ընկերությունները ներկայացնում են  առողջապահության ոլորտին վերաբերող տեխնոլոգիական նորությունները։ Համաժողովին մասնակցում են նորարարական մոտեցումներ եւ  նոր տեխնոլոգիական լուծումներ առաջարկող ընկերություններ, առողջապահության, դեղագործության ոլորտների, աշխարհի հայտնի բժշկական համալսարանների ներկայացուցիչներ։

Հայաստանի «Էլեկտրոնային առողջապահության ազգային օպերատոր» ՓԲ ընկերության հիմնադիրներից «Sylex SARL» ընկերությունը համաժողովի ցուցահանդեսային հարթակում հանդես է գալիս առանձին տաղավարով՝  ներկայացնելով էլեկտրոնային առողջապահության ոլորտի իր նոր լուծումները, այդ թվում՝ արհեստական բանականության կիրառմամբ ախտորոշիչ որոշումներին աջակցող համակարգը։  Ընկերության հայ մասնագետների մշակած ռոբոտ-համակարգը կարող է կատարել թերապեւտ-բժշկի օգնականի դեր եւ օգնել մասնագետ բժշկին առավելագույնս ճիշտ ախտորոշում կատարելու հարցում։

«HIMSS –ին մասնակցելը երկու նպատակ ունի՝ ներկայացնել քեզ եւ ծանոթանալ աշխարհում ոլորտում կատարվող նորարարություններին։ Որպես առողջապահության ոլորտում գործող ՏՏ ընկերություն, մենք հետեւում ենք ոլորտի ընդհանուր զարգացումներին։ Մեր ինժեներները նույնպես ձգտում են նորին, ավելի բարձրին։ Մենք ամեն տարի HIMSS –ում եղել ենք որպես այցելու՝ նորարություններին ծանոթանալու համար։ Հպարտ ենք, որ այս տարի միջազգային այնպիսի  հսկաների հետ, ինչպիսիք ենք, օրինակ, IBM-ը,  Oracle Corporation-ը եւ այլն,  ունենք մեր տաղավարը»,-ասում է «Sylex SARL» ընկերության տնօրեն Ավետ Մանուկյանը։

Նա նշում է, որ ներկայումս ոլորտում բավականին մեծ հետաքրքրություն եւ պահանջարկ կա արհեստական բանականությամբ գործող համակարգերի նկատմամբ։  Ներկայացված համակարգը՝ թերապեւտ բժշկի ռոբոտ-օգնականը, կարող է բժշկին օգնել արագ եւ ավելի ճշգրիտ ախտորոշում իրականացնել, խուսափել  ավելորդ չափումներից ու հետազոտություններից, ինչպես նաեւ խնայել բժշկի ժամանակը, որը նա կարող է օգտագործել ուրիշ հիվանդների ընդունելու համար։

«Համակարգը բժշկական հանրության համար է ստեղծված՝ որպես բժիշկների գործիք։  Երբ որ թեստավորման ընթացքում համոզվենք նրա բացարձակ արդյունավետության մեջ, արդեն կարող ենք վստահ առաջարկել օգտվել մեր «դոկտոր Լեքսի» ծառայություններից։ Իսկ առայժմ նախատեսում ենք  այն փորձարկել համալսարանական շրջանակում․  հնարավորություն ստեղծել բժշկական համալսարանների ավարտական կուրսերի ուսանողների համար մրցել արհեստական բանականության պրոդուկտի հետ»,-նշում է «Sylex SARL» ընկերության  զարգացման գծով տնօրեն Կարեն Բադալյանը։

Ընկերության ծրագրավորողների կողմից  ռոբոտ-համակարգի մշակման համար մեծ ծավալի աշխատանք է կատարվել։ Դրանցում ներգրավվել են  նաեւ բժիշկներ, օգտագործվել են հայտնի Merck կազմակերպության  բժշկական հանրագիտարանները, PubMed-ի տեղեկատվական բազաները։

Տեղեկանք Տեղեկատվական տեխնոլգիաների ոլորտում գործող «Sylex SARL» ընկերությունը,  «Մեյսիս Ապահով» ընկերության հետ  հանդիսանում է  Հայաստանի «Էլեկտրոնային առողջապահության ազգային օպերատոր» ՓԲ ընկերության հիմնադիրը։  «Sylex SARL» -ը մասնագիտացած է էլեկտրոնային առողջապահության եւ ապահովագրության ոլորտներում ծրագրային լուծումների մշակումների մեջ։  Այս ոլորտներում ընկերությունը նշանակալի միջազգային փորձ ունի։ «Sylex SARL» -ը  համարվում է համաշխարհային տեխնոլոգիական առաջատար «Ericsson Nikola Tesla» ընկերության գլոբալ գործընկերը։

Աղբյուր՝ news.am

21:00 14.02.2019

Ամենաշատ ընթերցվածները