ԱՎԵԼԻՆ

Հասարակական

Հանդիպում «Պահպանվող տարածքների աջակցման ծրագիր-Հայաստան»-ի թիմի ղեկավարի և անդամների հետ
13:00 15.02.2019

Հանդիպում «Պահպանվող տարածքների աջակցման ծրագիր-Հայաստան»-ի թիմի ղեկավարի և անդամների հետ

Փետրվարի 13-ին Սյունիքի մարզպետ Հունան Պողոսյանը հյուրընկալեց «Պահպանվող տարածքների աջակցման ծրագիր-Հայաստան»-ի ծրագրային թիմի ղեկավար Հայնո Հերթելին եւ թիմի անդամներին: 
Հանդիպումը ճանաչողական էր. Հ.Հերթելը մարզպետին ներկայացրեց ծրագիրը, դրա նպատակները, մինչ այժմ մարզի համայնքներում կատարված աշխատանքը, 2019-ի անելիքները՝ շեշտելով, որ ծրագիրը 2 բաղադրիչ ունի՝ սոցիալ-տնտեսական եւ բնապահպանական:

Ողջունելով հյուրերին եւ կարեւորելով ծրագրի շրջանակներում կատարված ներդրումները՝ Հունան Պողոսյանը շնորհակալություն հայտնեց իրականացված ծրագրերի համար: Մարզպետը համատեղ աշխատանքի եւ սերտ համագործակցության պատրաստակամություն հայտնեց՝ նշելով, որ մարզպետարանն ամեն կերպ կաջակցի ծրագրի արդյունավետ ընթացքին՝ մարզի համար դրական արդյունքների գրանցումն ապահովելու համար:

Թիմի ղեկավարը նշեց, որ ցանկանում են տեղյակ լինել Սյունիքի զարգացման ռազմավարությանը եւ դրա ուղղություններին, բնակավայրերի կամ կոնկրետ ոլորտների մասին մարզպետարանի տեսլականին, որպեսզի ծրագրեր կազմելիս իրենք խնդրին նույն ուղղվածությամբ մոտենան, եւ դրանք չհակասեն իրար: Պայմանավորվածություն ձեռք բերվեց մշակված ռազմավարությանը եւ զարգացման ծրագրերին թիմին ծանոթացնելու վերաբերյալ:

Ինչպես նաեւ առաջիկայում կլինեն հանդիպումներ, ու երկու կողմի մասնակցությամբ կոնկրետ ծրագրեր եւ անելիքներ կքննարկվեն:

Հիշեցնենք, որ «Պահպանվող տարածքների աջակցման ծրագիր-Հայաստան»-ը իրականացվում է ՀՀ բնապահպանության նախարարության կողմից, այն ֆինանսավորում է գերմանական KFW բանկը:

«ՊՏԱԾ-Հ» ծրագրի թիրախային պահպանվող տարածքներն են «Զանգեզուր» կենսոլորտային համալիր» ՊՈԱԿ-ի կողմից կառավարվող Սյունիքի մարզի 7 պահպանվող տարածքները: Մարզի 32 բնակավայր (նախկին համայնքներ) գտնվում են այս ծրագրի աջակցման գոտում:

Ծրագրի նպատակն է բարելավել Սյունիքի մարզի պահպանվող տարածքների բնական պաշարների պահպանությունն ու այդ տարածքների կառավարումը, կենսաբազմազանության պահպանության վրա ուղղակի ազդեցություն ունեցող պետական կառույցների կարողությունների հզորացումը եւ աջակցել այս տարածքներին` միաժամանակ բարելավելով հարակից համայնքների սոցիալ-տնտեսական վիճակը:

Աղբյուր՝ Սյունիքի մարզպետարան

13:00 15.02.2019

Ամենաշատ ընթերցվածները