Հասարակական
Թու-թու-թու, ցրտահարություն չի սպասվում
Հանրապետության հովտային և նախալեռնային շրջաններում ցրտահարություն 99 տոկոսով չի սպասվում: Այս մասին այսօր կառավարության նիստում ասաց ՀՀ արտակարգ իրավիճակների նախարար Ֆելիքս Ցոլակյանը՝ կատակով ավելացնելով. «Թու-թու-թու»:
Նախարարը նշեց, որ մայիս-ապրիլին տեղումների քանակը ավելի է լինելու, հունիսին՝ նորմայի սահմաններում:
Ֆելիքս Ցոլակյանը տեղեկացրեց, որ Սևանա լճի մակարդակը այսօրվա դրությամբ՝ նախորդ տարվա համեմատ, 7սմ-ով պակաս է, ինչն, ըստ նրա, նորմալ է:
«Պատճառն այն է, որ անցած տարի կլիման տաք էր և հալքը եղել է, իսկ այս տարի չկա և հետո է լինելու: Սևանա լճի մակարդակը 45 սմ մոտավորապես կբարձրանա ջրառից առաջ», - ասաց Ֆելիքս Ցոլակյանը:
Նա նաև նշեց, որ տարեվերջին Սևանի մակարդակը՝ 5-10 սմ-ով ավելի կլինի։
Անդրադառնալով Ախուրյանի ջրամբարին՝ Ֆելիքս Ցոլակյանն ասաց, որ այստեղ քիչ ջուր կա, ինչը կապված է ցրտի հետ, սակայն ջրառից առաջ ջրամբարի առավելագույն լցվածության մակարդակը կլինի 90-95 տոկոս:
Ինչ վերաբերում է Արփի ջրմաբարին, նախարարն ասաց, որ այստեղ խնդիր ունեն՝ կապված պատվարի հետ և այլն:
ԱԻ նախարարը նշեց, որ 2018 թ-ի համեմատ այս տարին ավելի նպաստավոր է, որոշ շրջաններում ձյան շերտը հասնում է 70-100 սմ և ուշ հալվելու դեպքում լցվելու են ջրամբարներ. «Այն ջրամբարները, որոնք օգտագործվում են ոռոգման նպատակներով, լցված կլինեն 80-90 տոկոս»:
Աղբյուրը՝ Panorama.am