ԱՎԵԼԻՆ

Տնտեսական

Սննդամթերքի համաշխարհային գներն արդեն հինգերորդ ամիսն աճում են
17:00 14.06.2019

Սննդամթերքի համաշխարհային գներն արդեն հինգերորդ ամիսն աճում են

Սննդամթերքի համաշխարհային գներն արդեն հինգերորդ ամիսն է աճ են արձանագրում, ինչը պայմանավորված է մայիսին անբարենպաստ եղանակային պայմանների հետևանքով պանրի և եգիպտացորենի գների բարձրացմամբ:

Պարենային ապրանքների գնային ինդեքսը, որը պարենային ապրանքների որոշակի զամբյուղի միջազգային գների ամսական փոփոխության չափման միջոց է, մայիսին կազմել է միջինը 172.4 միավոր, ինչը նախորդ ամսվա համեմատ բարձր է 1.2 տոկոսով, սակայն 1.9 տոկոսով ցածր 2018թ. մայիսի ցուցանիշից:

Ինչպես «Արմենպրես»-ին տեղեկացրին ՄԱԿ-ի Պարենի և գյուղատնտեսության կազմակերպության Հայաստանի գրասենյակից, ՊԳԿ կաթնամթերքի գնային ինդեքսը ապրիլի համեմատ աճել է 5.2 տոկոսով` մոտենալով հինգ տարվա ընթացքում գրանցած ամենաբարձր ցուցանիշին: Աճը հիմնականում պայմանավորված է երաշտից տուժած Օվկիանիայիում կաթնամթերքի արտահանման սուղ հնարավորությունների պայմաններում պանրի միջազգային բարձր գներով, որն էլ իր հերթին անդրադառնում է համաշխարհային բարձր պահանջարկի վրա:

ՊԳԿ հացահատիկային մշակաբույսերի գնային ինդեքսը աճել է 1.4 տոկոսով, ինչը ամբողջությամբ պայմանավորված է եգիպտացորենի գների անսպասելի աճով, որը հետևանք է ԱՄՆ-ում ջրհեղեղի և անձրևների պատճառով տվյալ մշակաբույսի սպասվող արտադրանքի ծավալների նվազեցմամբ: Ցորենի գները հիմնականում անկում են գրանցել, իսկ բրնձինը՝ ընդհանուր առմամբ կայուն է եղել:

ՊԳԿ շաքարի գնային ինդեքսը նվազել է 3.2 տոկոսով, քանի որ աշխարհում շաքար արտադրող հիմնական երկրում՝ Հնդկաստանում, սպասվող արտադրանքի ծավալները գերազանցել են Բրազիլիայում արտադրության տարեկան 17 տոկոս անկումը: Էլեկտրաէներգիայի միջազգային գների անկումը, որի պատճառով նվազել  է շաքարեղեգից  բիովառելիք ստանալու պահանջարկը, նույպես բացասաբար է ազդել շաքարի գների վրա:

ՊԳԿ բուսական յուղերի գնային ինդեքսը նվազել է 1.1 տոկոսով՝ շնորհիվ արմավենու յուղի արժեքի նվազման, ինչը առաջատար արտահանող երկրներում պաշարների մեծ ծավալների առկայության հետևանք է: Սոյայի, արևածաղկի և հլածուկի յուղերի գները չնչին աճ են գրանցել:

ՊԳԿ մսի գնային ինդեքսը մայիսին կտրուկ աճել է, քանի որ խոզի մսի գնառաջարկը շարունակ բարձրացել է՝ Արևելյան Ասիայի երկրներից պահանջարկի մեծացմանը ցուգընթաց, որտեղ խոզերի աֆրիկյան ժանտախտը վնասներ է հասցրել: Տավարի մսի գինը ապրիլին արձանագրված բարձր գնի համեմատ նվազել է, ինչը ազդում է արտահանման համաշխարհային գների վրա:

ՄԱԿ-ի Պարենի և գյուղատնտեսության կազմակերպությունը հրապարակել է նաև հացահատիկային մշակաբույսերի համաշխարհային արտադրության ծավալների նոր ցուցանիշները, որոնց կարելի է ծանոթանալ այստեղ:

Աղբյուրը՝ «Արմենպրես»

17:00 14.06.2019

Ամենաշատ ընթերցվածները