Մամուլ
Նորոգվում է քարուքանդ հատվածը
Արդեն մեկ ամսից ավելի է, ինչ հիմնանորոգվում է Երևան - Մեղրի մայրուղու Նոր Առաջաձորից դեպի Կարմրաքար ընկած ճանապարհահատվածը։ «Հալդի Քոնսալթ» ՍՊԸ նախագծային ընկերությունը կատարել է երկրաբանական ուսումնասիրություն, և տարածքային կառավարման և ենթակառուցվածքների նախարարությունը մրցույթ է հայտարարել։ Հաղթող է ճանաչվել «Կապանի ճանապարհների շինարարություն և շահագործում» ՍՊԸ-ն, որի հետ էլ սեպտեմբերի 12-ին կնքվել է պայմանագիր։
Թեև յուրաքանչյուր տարի իրականացվել է նորոգման աշխատանք, այնուամենայնիվ, մեծ բեռնատարողությամբ մեքենաների շահագործման հետևանքով առաջացել էին բազմաթիվ փոսեր։ «Ճանապարհային ծածկի միջին նորոգում իրականացվել է գրեթե 12-18 տարի առաջ։ Ներկա պահին ճանապարհային ծածկը ունի ոչ համասեռ կառուցվածք», - ասաց Կապանի ՃՇՇ գլխավոր ճարտարագետ Սերգեյ Առուստամյանը։
Այժմ իրականացնում են վերին շերտի ասֆալտապատում․ «Ճանապարհի երկու հատվածում տեղադրված են երթևեկության նշաններ, բացի դրանից՝ մեր աշխատակիցները կարգավորում են երթևեկությունը», - ասաց Կապանի ՃՇՇ աշխղեկ Ժորա Մուսայելյանը։
Հիմնանորոգման համար նախատեսվել է 154 միլիոն դրամ։ Աշխատանքների որակը վերահսկում է «ՀՀ նախագծերի պետական արտագերատեսչական փորձաքննություն» ընկերությունը։ Աշխղեկ Ժորա Մուսայելյանի խոսքով՝ ձգտում են հիմնանորոգումը հնարավորինս արագ ավարտել, քանի որ առջևում ձմեռ է․ «Արդեն ճանապարհի մի մասը ավարտել ենք, մնացել է մոտավորապես 700 գծամետր հատված։ Դրանից բացի՝ տեղադրվում են 596 գծամետր արգելափակոցներ, ինչպես նաև կատարվում են ջրահեռացման համակարգի վերանորոգման և հիմնանորոգման աշխատանքներ»։
Գործը նախատեսվում է ավարտել նոյեմբերի 12-ին։
Նարե Խաչատրյան