Մամուլ
Շներին պաշտպանե՞լ, թե՞ շներից պաշտպանվել
Ազգային ժողովը հոկտեմբերի 23-ին երկրորդ ընթերցմամբ ընդունեց կենդանիների նկատմամբ դաժան վերաբերմունքը քրեականացնող օրենքի նախագիծը, որը ներկայացրել էր ԲՀԿ խմբակցության պատգամավոր Նաիրա Զոհրաբյանը: Այսուհետ օրենքով արգելվում է կենդանիների նկատմամբ դաժան վերաբերմունքի որևէ դրսևորում: Սահմանված տույժերը սկսվում են 100 հազար դրամից, ընդհուպ մինչև ազատազրկում:
Իհարկե, ընդունված օրենքը հումանիստական տեսանկյունից ճիշտ է, սակայն կենդանիներին պաշտպանելուց բացի՝ հարկավոր է ապահովել նաև քաղաքացիների անվտանգությունը: Օրինակը բերենք թափառող շների վրա, որոնց թիվը վերջին շրջանում աճել է: Պարբերաբար ագրեսիվ վարք դրսևորած կենդանիները հարձակվում են մարդկանց վրա: Անասնաբույժ, համաճարակաբան Ռիմա Հարությունյանը մեզ հետ ունեցած զրույցում նշեց, որ լեշմանիոզը և ճճվակրությունը շնից մարդուն ամենահեշտ փոխանցվող հիվանդություններից են՝ չհաշված տհաճ հիվանդությունների մի այլ փունջ:
Մասնագետի կարծիքով՝ ամենաճիշտ տարբերակը մեկուսարանի հիմնումն է, որտեղ կբերվեն կենդանիները, այնուհետ կստերջացվեն:
Նախկինի պես չի ստացվի
Կապանից բացի՝ նույն խնդիրը նկատվում է նաև Սիսիանում: Թափառող շների ոհմակները հասնում են բնակելի շենքերի մուտքեր, ցաքուցրիվ անում բակերի աղբամանների պարունակությունը: Սիսիանի համայնքապետարանի քաղաքաշինության բաժնի պետ Սիմոն Հովհաննիսյանը իր խոսքում նշեց. «Բողոքողների քանակը օրեցօր ավելանում է, իսկ օրենք ընդունողները խնդրի լուծման ոչ մի տարբերակ չեն առաջարկել, մինչև մի որոշման սպասենք, քաղաքը կլցվի շներով: Նախկինում մենք որսորդի հետ կնքած պայմանագիր ունեինք, շները սպանվում էին և թաղվում քաղաքից հեռու մի տեղ: Բա հիմա ի՞նչ անենք, համապատասխան որոշմանը ինչքա՞ն սպասենք»:
Կապանի համայնքապետարանից նույնպես տեղեկացանք, որ օրենքի ընդունումից հետո կսպասեն հետագա հրահանգավորումների: Իսկ ահա Գորիսի համայնքապետի տեղակալ Իրինա Յոլյանը վստահեցրեց, որ համայնքում տևական ժամանակ է, ինչ սպանդ չի իրականացվում, շներն էլ անհանգստություն չեն պատճառում, հարձակման դեպքեր չեն արձանագրվել: Կարծում է՝ պատճառը աղբահանության ռեժիմի կարգավորումն է և աղբավայրի՝ քաղաքից հեռու գտնվելը:
Իսկ ի՞նչ կլինի հետո
Մեզ հետ ունեցած զրույցում Նաիրա Զոհրաբյանը դժվարացավ պատասխանել, թե ինչպես վարվել վտանգ ներկայացնող կենդանիների հետ: «Սա նախագծերի փաթեթ է, և առաջին փուլում ընդունել ենք կենդանիների հանդեպ դաժան վերաբերմունքը քրեականացնելու նախագիծը, հիմա արդեն պատրաստում ենք կենդանիների հանդեպ պատասխանատու վերաբերմունքի նախագիծ»: Պատգամավորի խոսքից հասկացանք, որ հենց այդ նախագծի մեջ էլ լինելու է մեզ հուզող հարցերի պատասխանը: Նախատեսվում է մինչև տարեվերջ ավարտել նախագիծը: «Բայց դա չի նշանակում, որ հենց հունվարից շների համար նախատեսված ապաստարանները կսկսեն գործել, օրենքը պետք է ունենանք, որ սկսենք կյանքի կոչել դրույթները», - ասաց պատգամավորը։
Իսկ ինչպե՞ս է ուրիշների մոտ
Գերմանիան աշխարհի առաջին երկիրն է, որտեղ կենդանիների պաշտպանության մասին կետ է ներառված սահմանադրությունում: Այս երկրում պաշտոնապես ընդունված է կենդանիների պաշտպան մասնագիտությունը:
Չինաստանում էլ է գործում հետաքրքիր օրենք, ըստ որի՝ մեկ բնակարանում թույլատրվում է պահել մեկ շուն: Օրենքի կիրառումը նպատակ ունի հնարավորինս նվազեցնել կենդանու՝ փողոցում հայտնվելու հավանականությունը:
Իսկ Ֆրանսիայում յուրաքանչյուր ընտանի շուն ունի տեղադրված չիպ, որում նշված է տիրոջ և կենդանու մասին անհրաժեշտ ամբողջ տեղեկատվությունը, ինչը նվազեցնում է շան՝ առանց հսկողության դրսում հայտնվելու հավանականությունը: Պահանջի որևէ կետ անտեսելու դեպքում տերը կտուգանվի 450 եվրոյով:
Անի Գրիգորյան