Քաղաքական
Թուրքիայում պաշտպանության նոր նախարար է նշանակվել
Հուլիսի 19-ին Թուրքիայի վարչապետ Բինալի Յըլդըրըմը նախագահ Ռեջեփ Թայիփ Էրդողանի հետ հանդիպումից հետո հայտարարել է Թուրքիայի նախարարների խորհրդի նոր կազմի մասին: Այս մասին հայտնում է թուրքական պետական «Անադոլու» գործակալությունը, որին էլ հղում է կատարում «Ռազմ.info» մասնագիտացված լրատվակայքը:
Թուրքիայի պաշտպանության նախկին նախարար Ֆիքրի Ըշըքը նոր կառավարությունում զբաղեցնելու է վարչապետի տեղակալի (փոխվարչապետ) պաշտոնը:
Իսկ երկրի պաշտպանության նախարարի պաշտոնում Ֆիքրի Ըշըքի փոխարեն նշանակվել է մինչև այս փոխվարչապետի պարտականությունները կատարող Նուրեդդին Ջանիքլին:
«Ռազմ.info»-ն հիշեցնում է, որ Ֆիքրի Ըշըքը պաշտպանության նախարարի պաշտոնում էր նշանակվել 2016թ. մայիսին, երբ Թուրքիայի նախկին վարչապետ Ահմեթ Դավութօղլուն հրաժարական էր տվել, ինչից հետո նոր վարչապետ էր նշանակվել Կապի և տրանսպորտի նախկին նախարար Բինալի Յըլդըրըմը:
Նոր կառավարության կազմում արտգործնախարարի պաշտոնը կրկին վստահվել է Մևլյութ Չավուշօղլուին, իսկ Ներքին գործերի նախարարինը` Սուլեյման Սոյլուին:
Նոր պաշտպանության նախարար Նուրեդդին Ջանիքլին ծնվել է 1960թ. Թուրքիայի Գիրեսուն նահանգում: 1997-2002թթ. եղել է թուրքական իշխանամետ «Յենի Շաֆաք» պարբերականի սյունակագիրներից մեկը: 2002թ. նոյեմբերի 3-ին ստեղծված «Արդարություն և զարգացում» կուսակցության հիմնադիր անդամներից է:
Տարբեր տարիների ընտրվել է Թուրքիայի խորհրդարանի պատգամավոր Թուրքիայի Գիրեսուն նահանգից: Թուրքիայի 62-րդ կառավարությունում զբաղեցրել է մաքսային և առևտրի նախարարի պաշտոնը:
2015թ. նոյեմբերի 1-ին ընտրություններից հետո իրականացրել է «Արդարություն և զարգացում» կուսակցության խորհրդարանական խմբակցության ղեկավարի պարտականությունները: Բինալի Յըլդըրըմի ղեկավարած 65-րդ կառավարությունում էլ նշանակվել է փոխվարչապետ:
Լուսանկարը՝ AlucraHaber.com-ի