Հասարակական
Սյունիքի մարզն արդեն պատրաստ է ձմռան մարտահրավերներին
Նոյեմբերի 17-ին ՀՀ արտակարգ իրավիճակների նախարար Դավիթ Տոնոյանի հանձնարարականով մեկնարկել են ձմեռային սեզոնի նախապատրաստական աշխատանքները: Սյունիքի մարզում ձնաբքի ժամանակ մարդկանց և տրանսպորտային միջոցների անվտանգ երթևեկությունն ապահովելու, անվտանգ տարածք տեղափոխելու, վարորդներին և ուղևորներին անհետաձգելի օգնություն ցուցաբերելու համար սկսվել են առաջնային օգնության հենակետերի տեղադրումներ:
Սյունիքի մարզի փրկարարական վարչության պետի տեղակալ Վրույր Բալայանը նշում է, որ ավելի հաճախ մեքենաների արգելափակումներ, ձնաբուք, մերկասառույց առաջանում են Սիսիան–Գորիս ավտոճանապարհին: Նրա խոսքով շուրջօրյա հենակետերը կծավալվեն Սյունիքի մարզի «Զանգեր» կոչվող հատվածից մինչև Գորիս համայնքն ընկած ճանապարհահատվածը, իսկ 10 հոգու համար նախատեսված ճանապարհային տնակներ կտեղադրվեն Գորիս– Սիսիան ճանապարհահատվածի 17-րդ կիլոմետրում և Շուռնուխ համայնքում:
Վրույր Բալայանը տեղեկացրեց, որ վարորդների և ուղևորների անվտանգ երթևեկության համար համապատասխան ճանապահաշինական ընկերությունները կիրականացնեն ձյան մաքրման, մերկասառույցի հեռացման աշխատանքներ:
Դժբախտ պատահարներից և ավտովթարներից խուսափելու համար Փրկարարական վարչության պատասխանատուները կոչ են անում լինել զգոն, օգտագործել ձմեռային անվադողեր և պահպանել երթևեկության կանոնները:
Թագուհի Մաթևոսյան
Zangezur.TV