Քաղաքական
Իրանի նախագահը հայտարարել է ԻՊ-ի դեմ հաղթանակի մասին
Press TV-ի եթերում Իրանի նախագահ Հասան Ռոուհանին հայտարարել է «Իսլամական պետություն» ահաբեկչական կազմակերպության դեմ հաղթանակի մասին: Փոխանցում է «Հայկական ժամանակ»-ը:
Նրա խոսքով իրենք և դաշնակիցները գրոհայինների դեմ հաղթանակ են տարել Սիրիայի և Իրաքի տարածքում: Ռոուհանին ԻՊ-ի դեմ հաղթանակն անվանել է «լավ նորություններ Իրանի և ողջ տարածաշրջանի բնակիչների համար»,- փոխանցում է Gazeta-ն:
Ավելի վաղ Սոչիում Սիրիայի նախագահ Բաշար Ասադի հանդիպումից հետո ՌԴ նախագահ Վլադիմիր Պուտինը հայտարարել էր, որ ռազմական գործողությունը Սիրիայում մոտ է ավարտին և այժմ հարկավոր է անցում կատարել քաղաքական գործընթացներին:
«Կարծում եմ՝ ահաբեկչության խնդիրը գլոբալ բնույթ ունի: Ահաբեկչության նկատմամբ լիարժեք հաղթանակը դեռ շատ հեռու է, բայց ինչ վերաբերում է մեր համատեղ աշխատանքին՝ Սիրիայի տարածքում ահաբեկիչների դեմ պայքարին, ապա այդ ռազմական օպերացիան իսկապես ավարտվում է»,- ասել է Պուտինը:
Նրա խոսքով այժմ ժամանակն է անցնել քաղաքական գործընթացներին: Նա գնահատել է Բաշար Ասադի՝ այդ ուղղությամբ աշխատելու պատրաստակամությունը:
Լուսանկարը՝ TheWire.in-ի