Հասարակական
Կապանի Ալ. Շիրվանզադեի անվան թատրոնի հյուրերն Արցախից էին
Այսօր Կապանի Ալեքսանդր Շիրվանզադեի անվան պետական դրամատիկական թատրոնի հյուրերն Արցախի Հանրապետությունից էին:
Շուշիի Մկրտիչ Խանդամիրյանի անվան պետական թատրոնի դերասանները Կապանի մանուկներին ներկայացան Լիլիթ Մկրտչյանի «Անուշահոտություն և գարշահոտություն» պատմվածքի հիման վրա ստեղծված «Մեր տունը» բեմադրությամբ: Ներկայացման մեջ արծարծվում է շրջակա միջավայրի աղտոտվածության, պահպանման և բարելավման, մարդկության արդի հիմնախնդիրները:
Տնօրեն Աշխեն Հարությունյանի տեղեկացմամբ՝ թատրոնը ՀՀ-ում հաճախակի է մասնակցում փառատոների, իսկ Կապանում երկրորդ անգամ է այցելում Սյունիքի մարզպետ Վահե Հակոբյանի աջակցությամբ: Ներկայացումը պատահական չեն ընտրել.
Աշխեն Հարությունյանը նշեց` գաղտնիք չէ, որ Ժամանակակից աշխարհին սպառնացող վտանգներից է շրջակա միջավայրի աղտոտվածությունը: Ըստ նրա՝ բեմադրության միջոցով փորձեցին երեխաների մեջ սերմանել շրջակա միջավայրը մաքուր պահելու մշակույթ:
Դերասանները ներկայացման միջոցով փորձել են ցույց տալ, թե ինչի կարող է հանգեցնել մեր միջավայրի նկատմամբ մարդկային անտարբերությունը:
Դերասանուհի Սվետա Առստամյանի խոսքով ներկայացումն ուսուցողական է, ընդ որում՝ երեխաների շրջանում շրջակա միջավայրի պահպանում և բարելավում ուսուցանելու արդյունավետ միջոց է: Ըստ նրա՝ նման թատերական հյուրախաղերն ավելի են ամրապնդում Արցախի և Հայաստանի հանրապետությունների միջև մշակութային կապը:
Տեղեկացնենք, որ թատրոնը նոյեմբերի 23-ին ներկայացումներով հանդես կգա նաև Գորիսում և Սիսիանում:
Թագուհի Մաթևոսյան
Zangezur.TV