Քաղաքական
Իրանն առաջարկում է Բաքու-Թբիլիսի-Կարս երկաթգիծը հասցնել Թավրիզ
Իրանի ճանապարհաշինության և քաղաքային զարգացման նախարար Աբաս Ահմադ Ախունդին հայտարարել է, որ թուրքական կողմի հետ քննարկվել է մոտ մեկ ամիս առաջ բացված Բաքու-Թբիլիսի-Կարս երգաթգիծը դեպի Իրանի Թավրիզ քաղաք ընդլայնելու հարցը, այս մասին գրել է ադրբեջանական APA գործակալությունը, փոխանցում է PanARMENIAN.Net-ը:
Կողմերը փոխըմբռնման հուշագիր են ստորագրել:
«Սա հավակնոտ նախագիծ է։ Եթե այն կյանքի կոչվի, օղակաձև երկաթուղի կձևավորվի։ Իրանն ու Թուրքիան նախագիծը կյանքի կոչելու համաձայնություն են հայտնել»,- ասել է Աբաս Ահմադ Ախունդին:
Անդրադառնալով Հարավ-Արևմուտք տրանսպորտային միջանցքին՝ նա ասել է նաև, որ այն կկարողանա մրցակցել տարածաշրջանային և համաշխարհային այլ միջանցքների հետ։
«Ես համոզված եմ, որ Իրանը, Ադրբեջանը, Վրաստանը և Ուկրաինան հաջողությամբ կգործակցեն նախագծի զարգացման շուրջ»,- ասել է իրանցի նախարարը:
Հոկտեմբերի 30-ին Բաքվում տեղի ունեցավ Բաքու-Թբիլիսի-Կարս երկաթգծի բացման հանդիսավոր արարողությունը, որին Ադրբեջանի նախագահ Իլհամ Ալիևի հրավերով ներկա էին Թուրքիայի նախագահ Ռեջեփ Թայիփ Էրդողանը, Վրաստանի վարչապետ Գեորգի Կվիրիկաշվիլին:
800 կմ երկարություն ունեցող երկաթուղու մոտ 500 կմ-ն անցնում է Ադրբեջանի, 300 կմ-ն՝ Վրաստանի, 50 կմ-ն՝ Թուրքիայի տարածքով։Նախատեսվում է, որ սկզբնական փուլում երկաթուղին կտեղափոխի տարեկան 1 մլն ուղևոր և 6,5 մլն տոննա բեռ։ Հետագայում նախատեսվում է ծավալը հասցնել 15-17 մլն-ի։
2007թ. փետրվարին Վրաստանը, Թուրքիան և Ադրբեջանը ստորագրեցին Հայաստանը շրջանցող Բաքու-Թբիլիս-Կարս երկաթուղային միջանցքի ստեղծման մասին միջկառավարական համաձայնագիրը: Շինարարական աշխատանքները մեկնարկել են 2008թ.:
Լուսանկարը՝ RailwayGazette.com-ի