Աշխարհ
Նեապոլիտանյան պիցցան դարձել է մարդկության մշակութային ժառանգությունը
Նեապոլիտանական պիցցայի պատրաստման արվեստն ընդգրկվել է ՅՈՒՆԵՍԿՕ-ի ոչ նյութական մշակութային ժառանգության ցուցակ, հայտնել է կազմակերպությունը Ոչ նյութական մշակութային ժառանգության պահպանման միջկառավարական խորհրդի հերթական նստաշրջանում, որն անցկացվում է հարավկորեական Չեջուում, փոխանցում է News.am-ը «ՌԻԱ Նովոստի»-ին հղումով:
ՅՈՒՆԵՍԿՕ-ն նեապոլիտանական պիցցայոլոների արվեստը որոշել է ըստ խոհարարական պրակտիկայի՝ կապված խմորը պատրաստելու և այն փայտի վառարանում թխելու հետ: Գործընթացի տարբերակիչ առանձնահատկությունն է օդում խմորով թխողի պտտվող շարժումները: Հիմա Իտալիայի հարավային մայրաքաղաքում ապրում է և հանդես գալիս մոտ 3 հազար պիցցայոլո:
Միաժամանակ մի քանի հետազոտությունների և օնլայն հարցումների տվյալներով պիցցան աշխարհում ամենատարածված իտալական բառն է: Նեապոլիտանական պիցցայի հետ միասին մարդկության ժառանգություն են համարվել ադրբեջանական դոլման, հայկական քոչարին, ղրղզական ձիասպորտային կոկ-բորու խաղը, իռլանդական պարկապզուկը և այլ սովորույթներ: