Քաղաքական
Թբիլիսիում քննարկվել է Թուրքիա-Վրաստան-Ադրբեջան եռակողմ ձևաչափով համագործակցությունը
Վրաստանն ու Թուրքիան քննարկել են ռազմական ոլորտում երկկողմ համագործակցությունը խորացնելու, փորձի և ռազմական կրթության փոխանակման հարցերը:
Այս քննարկումը տեղի է ունեցել հունվարի 10-ին Թբիլիսիում Վրաստանի պաշտպանության նախարար Լևան Իզորիայի և Վրաստանում Թուրքիայի նորանշանակ դեսպան Ֆաթմա Ջերեն Յազգանի հանդիպման ժամանակ:
Ինչպես հայտնում է Վրաստանի ՊՆ կայքը, որին հղումով փոխանցում է «Հայկական ժամանակ»-ը, քննարկման ժամանակ ուշադրություն է դարձվել միջազգային առաքելություններում երկու պետությունների զինված ուժերի համատեղ ծառայությանը: Նրանք նաև քննարկել են ՆԱՏՕ-Վրաստան համագործակցության փաթեթի իրականացմանը վերաբերող հարցեր:
Հանդիպման ժամանակ առանձին քննարկվել է նաև Թուրքիա-Վրաստան-Ադրբեջան եռակողմ ձևաչափով համագործակցությունը:
Օրաթերթը նշում է, որ երեք երկրների պաշտպանության նախարարները և ԶՈւ ԳՇ պետերը պարբերաբար եռակողմ հանդիպումներ են ունենում, իսկ զինված ուժերի ստորաբաժանումները համատեղ վարժանքներ են անցկացնում:
Լուսանկարը՝ KavkazPlus.com-ի