Քաղաքական
Ահաբեկիչների դեմ պայքարի շրջանակներում Իրանը ռազմաբժշիկներ է ուղարկել Իրաք և Սիրիա
Իրաքում և Սիրիայում ահաբեկչական խմբավորումների դեմ մարտերի ընթացքում վիրավորված զինծառայողներին բժշկական օգնություն տրամադրելու նպատակով Իրանի «Իսլամական հեղափոխության պահապանների կորպուս»-ը (ԻՀՊԿ) ռազմաբժիշկների խմբեր է ուղարկել այդ երկրներ։ Այս մասին հայտարարել է ԻՀՊԿ առողջապահության և բժշկական կրթության հարցերով տեղակալ, գեներալ Ահմադ Աբադոլլահին։ Այս մասին փետրվարի 26-ին տեղեկացրել է իրանական «Թասնիմ» լրատվական գործակալությունը։
Ըստ Աբադոլլահիի՝ ռազմաբժիշկները Սիրիա և Իրաք ուղարկվել են այդ երկրների խնդրանքով։ Այլ մանրամասներ Աբադոլլահին չի հայտնել, փոխանցում է «Ռազմ.ինֆո»-ն։
Մասնագիտացված լրատվակայքը հիշեցնում է, որ ավելի վաղ՝ 2017 հուլիսին, Իրանի նախագահ Հասան Ռոուհանին հայտարարեց, որ «Իսլամական պետություն» ահաբեկչական խմբավորման դեմ մղած պայքարում Իրանը աջակցել է Իրաքին՝ սպառազինություն մատակարարելով այդ երկրին։
Ռոուհանիի հայտարարության համաձայն՝ «Իրանը նաև հոգացել է Սիրիայի կարիքները»։
Իրաքին զենքով ապահովելու մասին մինչ այդ հայտարարել էր նաև «Իրանի իսլամական հեղափոխության պահապանների կորպուս»-ի (ԻՀՊԿ) «Ղոդս» ստորաբաժանման հրամանատար Ղասեմ Սոլեյմանին։
Իրանը համարվում է Իրաքի և Սիրիայի դաշնակիցը «Իսլամական պետություն» ահաբեկչական խմբավորման դեմ պայքարում։ Սակայն Իրանը մշտապես հերքում է, որ ռազմական ստորաբաժանումներ ունի այս երկրներում և իր օգնությունը որակում է որպես «խորհրդատվական»։ Իսկ Սիրիայում և Իրաքում զոհվող իրանցի մարտիկները, ըստ Իրանի, կամավորներ են։
Սիրիայում և Իրաքում Իրանի գործողությունները համակարգում է ԻՀՊԿ «Ղոդս» ստորաբաժանումը Ղասեմ Սոլեյմանիի հրամանատարությամբ։
Լուսանկարը՝ TasnimNews.com-ի