Քաղաքական
Աղվան Վարդանյանի կփոխարինի Արմենուհի Կյուրեղյանը
Լրագրողների հետ ճեպազրույցի ժամանակ ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը հայտարարել է, թե քանի որ Աղվան Վարդանյանը հեռացվել է խմբակցությունից, նաև կուսակցությունից, նրա փոխարեն խմբակցության քարտուղար կլինի Արմենուհի Կյուրեղյանը:
«Աղվան Վարդանյանի հետ կապված էլ ինչ ասես ասացին, առաջին նախագահն էր նաև անդրադարձել, մի փոքր բաժակ ջրում փորձում են փոթորիկ փնտրել: Աղվան Վարդանյանն առաջնորդվել է իր սահմանադրական իրավունքով ու խղճով ու վայր է դրել մանդատը»,- ասել է նա, ում խոսքերը փոխանցում է Tert.am-ը:
Ըստ Արմեն Ռուստամյանի՝ ոմանք «Դաշնակցության» ավանդույթներից ցնցումների մեջ են ընկնում:
«Բայց այդ կուսակցությունը հենց այդ ավանդույթների շնորհիվ է պահպանվում»,- նշել է Ռուստամյանը:
Դիտարկմանը, թե լուրեր կային, որ Աղվան Վարդանյանն ու Հրանտ Մարգարյանն են հակասություններ ունեցել, և նաև սա է առիթ հանդիսացել, որ Աղվան Վարդանյանին հեռացնեն կուսակցությունից, Ռուստամյանն արձագանքել է.«Տարբեր լուրեր շրջանառեցին:
Հակասությունները «Դաշնակցություն»-ում անձերի մեջ չի կարող բերել որևէ անձի նկատմամբ հետապնդման, անձը չի կարող որևէ մեկի ճակատագիրը տնօրինել, մենք կոլեգիալ մարմին ենք, կոլեգիալ մարմինն է որոշում»:
Լուսանկարը՝ YerkirMedia.am-ի