Հասարակական
«Նաիրիտ»–ի նախկին աշխատակիցները հանդիպել են նախագահ Արմեն Սարգսյանի հետ
Նախագահական նստավայրի դիմաց բողոքի ակցիա իրականացնող «Նաիրիտ» գործարանի նախկին աշխատակիցների հետ հանդիպել է նախագահ Արմեն Սարգսյանը: Tert.am-ի հետ զրուցում փաստաբան Տիգրան Սարգսյանն ասել է, որ նախագահին ներկայացրել է դատական նիստերի հետ կապված իրենց դժգոհությունները:
«Նախագահը լսեց, ասաց, որ կխորհրդակցի Բարձրագույն դատական խորհրդի նախագահ Գագիկ Հարությունյանի հետ, հարցերը կպահի վերահսկողության ներքո: Մենք ներկայացրինք նաև մեր դժգոհությունները Վճռաբեկ դատարանի նախագահի հետ կապված, խոստացավ բոլոր հարցերը քննարկել»,- շեշտել է նա:
Փաստաբանի խոսքով Նախագահն ասել է, որ պատրաստ է երկարատև համագործակցության նաիրիտցիների հետ, թող պատվիրակություններ կազմեն հետագա հանդիպումների համար:
Լրատվակայքը հիշեցնում է, որ գործարանի նախկին աշխատակիցները նախագահականի դիմաց բողոքի ակցիա են իրականացնում՝ պահանջելով Արմեն Սարգսյանից՝ որպես Սահմանադրության երաշխավոր, վերահսկել դատարանների աշխատանքը և թույլ չտալ, որ մարդկանց իրավունքները ոտնահարվեն:
Նրանք պահանջում են անվավեր ճանաչել «Նաիրիտ 2»-ի հետ կնքված պայմանագրերը, որոնցով հրաժարվել էին աշխատավարձերի չվճարման տույժ տուգանքներից:
Լուսանկարը՝ Tert.am-ի