Հասարակական
Ռուսաստանն արգելում է Հայաստանից կենդանիների, թռչունների ներկրումը
Ռոսսելխոզնադզորը հունիսի 14-ից արգելում է Հայաստանից Ռուսաստան բոլոր տեսակի ողջ կենդանիների, թռչունների, սողունների ներկրումը: ՌԴ պետական մարմնի պաշտոնական էջում հրապարակված տեղեկատվության համաձայն, արգելքի նպատակն է պաշտպանել ՌԴ տարածքը՝ մարդկանց ու կենդանիների կյանքի համար հատկապես վտանգավոր հիվանդությունների ներթափանցումից:
Բացառություն են կազմում անձնական օգտագործման նպատակով տերերի կողմից շների, կատուների, կզաքիսների, գերմանամուկի, դեղձանիկի, թութակների ներկրումը, սակայն ոչ ավելի քան երկու գլուխ:
Ռուսական կողմի պաշտոնական հաղոդագրության մեջ չի մանրամասնվում, թե ինչ հիվանդությունների մասին է խոսքը: Հայկական կողմն էլ խնդրի վերաբերյալ որևէ տեղեկատվություն մինչ այս պահը չի տարածել:
Աղբյուր` Panorama.am