Սյունիք
Կայացավ հանրային քննարկում «Կապանի ԼՀԿ» ՓԲԸ-ի Գեղանուշի պոչամբարի վերաբերյալ
2018-ի սեպտեմբերի 18-ին Կապանի համայնքապետարանի նիստերի դահլիճում «Շրջակա միջավայրի վրա ազդեցության գնահատման և փորձաքննության մասին» ՀՀ օրենքով սահմանված կարգով նախնական փորձաքննության գործընթացի շրջանակներում կայացավ «Կապանի ԼՀԿ» ՓԲԸ-ի Գեղանուշի պոչամբարի անվտանգությունն ու հուսալիությունը բարձրացնելու աշխատանքների իրականացման վերաբերյալ նախնական գնահատման փուլի հանրային քննարկումը (առաջին հանրային քննարկում):
Ծրագրի նպատակն է ամրացնել պոչամբարի հիդրոտեխնիկական կառույցները և բարձրացնել դրանց սեյսմակայունությունը, նորացնել ռեսուրսը սպառած ենթակառուցվածքները:
Պոչամբարի՝ գործող աշխատանքային նախագծով սահմանված ծավալը մնալու է անփոփոխ:
Հանրային քննարկումը վարեց Կապանի համայնքապետարանի գյուղատնտեսության և հողօգտագործման բաժնի պետի պաշտոնակատար Ավետիք Համբարձումյանը:
Նախնական գնահատման հայտը ներկայացրեց և ներկաների հարցերին պատասխանեց «Կապանի ԼՀԿ» ՓԲԸ գլխավոր տնօրենի հասարակայնության հետ կապերի եւ սոցիալական քաղաքականության գծով տեղակալ Վահրամ Ավագյանը։
Քննարկմանը ներկա էին նաև իրականացվելիք աշխատանքները կատարող «Հայհիդրոէներգանախագիծ» ՓԲԸ-ի մասնագետները, ովքեր նույնպես պատասխանեցին ներկաների հարցերին։
Հանրային քննարկումը վարող Ավետիք Համբարձումյանը հանդիպումը եզրափակեց դրական կարծիքով և ընկերությանը՝ պոչամբարի անվտանգությունն ու հուսալիությունը բարձրացնելու գործում հաջողություն մաղթեց։
Կապանի համայնքապետարան