Հասարակական
Պարապմունքներ Կապանի լեռնափրկարարական ջոկատում՝ «Վթար հանքում» եւ «Թունավորում» թեմաներով
Օրերս ՀՀ ԱԻՆ «Հատուկ լեռնափրկարար ծառայություն» ՓԲԸ Կապանի լեռնափրկարարական ջոկատում անցկացվեցին պլանային պարապմունքներ՝ «Վթար հանքում» եւ «Թունավորում» թեմաներով:
Վարժանքի նպատակն էր` կատարելագործել ջոկերի շնչադիմակավոր-լեռնափրկարարների գործնական ունակությունները փրկարարական աշխատանքների եւ վթարների հետեւանքների վերացման ժամանակ,
նպաստել լեռնափրկարարական աշխատանքների ժամանակ հերթապահ ջոկի ուժերի եւ միջոցների ղեկավարման ունակությունների կատարելագործմանը,
ստուգել ներգրավված ջոկերի պատրաստվածությունը` իրենց առջեւ դրված խնդիրների լուծման ուղղությամբ:
Պարապմունքն անցկացվեց երկու փուլով՝ փլուզում եւ թունավորում: Սցենարի համաձայն՝ ահազանգ էր ստացվել, որ Շահումյանի անվան հանքի 775 հորիզոնի թիվ 17 երակում տեղի էր ունեցել հանքի առաստաղի մասնակի փլուզում, որի հետեւանքով տուժել էր հանքի աշխատակիցը: Շնչառական “Drager” սարքով պաշտպանված եւ նույն մակնիշի գազաանալիզատորի օգնությամբ հրամանատարը ստուգեց տեղանքի մթնոլորտը, ապա ջոկին հրահանգեց մոտենալ տուժածին: Լեռնափրկարարները պնեւմոսարքի միջոցով կտրեցին մետաղական կառուցվածքները եւ փլատակներից դուրս բերեցին տուժածին՝ անշարժացնելով վնասված վերջույթն ու նրան տեղափոխելով պատգարակի վրա:
Ըստ երկրորդ փուլի սցենարի՝ ահազանգ էր ստացվել, որ նույն տեղանքում հայտնաբերվել է հանքի աշխատակից՝ թունավորման ախտանշաներով: Պայմանական վթարի վայր հասնելուն պես լեռնափրկարար-շնչադիմակավորները տուժածին հագցրեցին շնչառական սարքավորումը, չափեցին սրտի զարկը, ստուգեցին ընդհանուր վիճակը, այնուհետեւ, պատգարակի վրա բերելով կողքի անվտանգ դիրքի, տեղափոխեցին շտապօգնության մեքենա: Կոմբինատի բժշկական ծառայության ուղեկցությամբ տուժածին տեղափոխեցին Կապանի բժշկական կենտրոն:
Պարապմունքների ավարտին մասնակիցներն ամփոփեցին կատարած աշխատանքի արդյունքները՝ նշելով ճիշտ իրականացված գործողությունները, բացթողումներն ու նախանշելով թերությունների վերացման ուղիները:
Աղբյուր՝ news.am