Մամուլ
Ադրբեջանական զինուժն ավելի քան մեկ ժամ գնդակոծել է Բարեկամավանը
Բարեկամավանի նախկին գյուղապետ Հովիկ Ղարաքեշիշյանն այսօր՝ հուլիսի 22-ին, հայտնել է, որ անցած գիշեր ադրբեջանական զինուժն ավելի քան մեկ ժամ գնդակոծել է Տավուշի մարզի Բարեկամավան գյուղը:
Նրա խոսքերով՝ ադրբեջանական զինուժը մինչ այդ կրակում էր գյուղի պաշտպանական դիրքերի վրա:
Նա ասել է.«Ժամը 12-ից 5 պակաս գյուղի վրա առաջին կրակոցը եղավ: Հարվածեցին իմ տանը, տանիքի շիֆերը փշրվելով թափվեց իմ կողքին, ես ևս կարող էի տուժել»:
Գյուղի գնդակոծությունը տևել է մինչև գիշերվա ժամը 1-ը: Վնասվել են տների տանիքներ:
Հ. Ղարաքեշիշյանին հարցրինք, թե ինչ զենքերից է գնդակոծվել գյուղը: Նա ասաց՝ հավանաբար «ԴՇԿ» և «ԱԳՍ» զենքերից: Նախկին գյուղապետը հայտնեց, որ Բարեկամավան գյուղը վաղուց չէր գնդակոծվել. վերջին շրջանում դա առաջին դեպքն էր:
«Առավոտ» օրաթերթ