Քաղաքական
«Ռուսական C-400 համակարգեր գնելով` Թուրքիան ոտնահարել է Կոնգրեսի կողմից սահմանված պատժամիջոցները». սենատոր
«Չի բացառվում, որ ռուսական արտադրության C-400 հրթիռային համակարգեր գնելով` Թուրքիան խախտել է Ռուսաստանի դեմ մոտ մեկ ամիս առաջ սահմանված պատժամիջոցները»:
Նման բովանդակության նամակով նախագահ Թրամփի վարչակազմին է դիմել Մերիլենդ նահանգից ընտրված դեմոկրատ սենատոր Բեն Քարդինը, փոխանցում է «Ազատություն» ռադիոկայանը:
Նրա խոսքով՝ 2 միլիարդ 500 միլիոն դոլար ընդհանուր արժողությամբ այս գործարքը խախտում է Կոնգրեսի կողմից անցած ամիս հաստատված պատժամիջոցների փաթեթը:
«Այս օրինագծի համաձայն՝ ցանկացած անհատ, կազմակերպություն կամ պետություն, որը մեծածավալ գործարք կկնքի Ռուսաստանի պաշտպանական արդյունաբերության ձեռնարկությունների հետ, ենթակա է պատժամիջոցների»,- նշել է ամերիկացի սենատորը:
«Ցավալի է, որ Միացյալ Նահանգների դաշնակից Թուրքիան այս բախտորոշ ժամանակահատվածում անցել է Մոսկվայի կողմը»,- նշել է Քարդինը Սպիտակ տուն ուղարկած նամակում:
Լուսանկարը՝ NriNews24x7.com-ի