Հասարակական
1 տարում ՀՀ-ում 1622 աղբանոց է մաքրվել
2018 թվականի մարտ ամսվա դրությամբ «Մաքուր Հայաստան» ծրագրի շրջանակում Հայաստանում արձանագրված 2,031 աղբանոցից մաքրվել կամ կոնսերվացվել է 1,622-ը: ՀՀ Կառավարության Տեղեկատվության և հասարակայնության հետ կապերի վարչության փոխանցմամբ այս մասին գործադիրի մարտի 29-ի նիստին ասել է վարչապետ Կարեն Կարապետյանը:
Դեռևս փակման է ենթակա 108 աղբանոց:
Վարչապետը հանձնարարել է Տարածքային կառավարման և զարգացման նախարարին, մարզպետներին, առաջարկել Երևանի քաղաքապետին և համայնքների ղեկավարներին 10-օրյա ժամկետում մշակել «Մաքուր Հայաստան» ծրագրի շրջանակում նոր գործողությունների ծրագիր` սահմանելով հստակ ժամանակացույց և ըստ ոլորտի գործողությունների պատասխանատուներ՝ միաժամանակ ընդգրկելով հնարավոր բոլոր շահագրգիռ կառույցների մասնակցությունն ու օժանդակությունը։
«Ծրագիրը մշակելիս նախատեսել, որ իրավաբանական անձանց հետ աղբահանության պայմանագրերի կնքման աշխատանքները պետք է ավարտին հասցվեն մինչև հունիսի 1-ը և թերությունների դեպքում կկիրառվեն պատասխանատվության միջոցներ։ Հարկավոր է նախատեսել նաև տարվա կտրվածքով 4 շաբաթօրյակների կազմակերպման գրաֆիկ, ինչպես նաև հատկապես ուշադրություն դարձնել առաջիկայում նախատեսված համապետական միջոցառումներին, զբոսաշրջային ուղղություններին, պատմամշակութային տարածքների և բնական ու պատմական հուշարձանների տարածքները մաքուր պահելու գործողություններին»,- ասել է Վարչապետը։
Հարակից նյութեր
Ամենաշատ ընթերցվածները
