Սիրիայի նախագահ Բաշար ալ-Ասադը, ում արևմտյան երկրները մեղադրում են պատերազմական հանցագործությունների մեջ, Ֆրանսիային է վերադարձրել Պատվո լեգեոնի շքանշանը, որով պարգևատրվել էր 2001 թվականին: Այս մասին փոխանցում է «Ազատություն»-ը:
Սիրիայի արտգործնախարարության հայտարարության մեջ նշվում է, որ շքանշանը ապրիլի 19-ին փոխանցվել է Դամասկոսում Ռումինիայի դեսպանությանը, որն այժմ Սիրիայում ներկայացնում է նաև Ֆրանսիայի շահերը:
France-Presse-ի հետ զրույցում Ասադի մերձավոր շրջապատի ներկայացուցիչը նշել է, որ Սիրիայի նախագահը շքանշանը վերադարձրել է ի նշան բողոքի ապրիլի 14-ին իր երկրի տարածքում հրթիռային հարվածների դեմ, որոնց մասնակցել է նաև Ֆրանսիան:
ԱՄՆ-ը, Մեծ Բրիտանիան և Ֆրանսիան հարվածներ են հասցրել ի պատասխան սիրիական բանակի կողմից քիմիական զենքի ենթադրյալ կիրառման:
Դեռևս երկուշաբթի օրը Ֆրանսիայի նախագահ Էմանյուել Մակրոնը հայտնել էր, որ Փարիզը Ասադի պարգևատրման վերանայման գործընթաց է սկսել:
Սիրիայի նախագահ Բաշար Ասադը Ֆրանսիայի ամենաբարձր պարգևներից մեկին է արժանացել հոր մահից հետո երկրի կառավարման ղեկը ստանձնելիս:
Ֆրանսիան Պատվո լեգեոնի շքանշանով պարգևատրել է հարյուրավոր օտարերկրացիների՝ այդ թվում Ռուսաստանի նախագահ Վլադիմիր Պուտինին:
Լուսանկարը՝ JapanTimes.co.jp-ի
