Փաստաբան Արշավիր Խալափյանը նամակով դիմել է Կապանի քաղաքապետ Աշոտ Հայրապետյանին՝ գեներալ Մանվել Գրիգորյանին Կապանի պատվավոր քաղաքացի կոչումից զրկելու առաջարկով։ «Առաջին լրատվական»-ի հետ զրույցում քաղաքապետ Հայրապետյանն ասաց, որ նամակը դեռ հիմք չէ ավագանու նիստ հրավիրելու համար։ Այնուամենայնիվ, երեկ ավագանու անդամների հետ միասին քննարկում է տեղի ունեցել արտահերթ նիստ հրավիրելու հարցով և ավագանու անդամներն արդեն գրավոր դիմել են համայնքի ղեկավարին՝ Մանվել Գրիգորյանին Կապանի պատվավոր քաղաքացի կոչումից զրկելու օրակարգով հրավիրել արտահերթ նիստ։
«Մենք քննարկումների արդյունքում եկանք այն որոշմանը, որ այսօր հրավիրում ենք հանրային խորհրդի ընդլայնված նիստ։ Հրավիրված են՝ համայնքի բոլոր տարիների ավագանու անդամները, համայնքի նախկին ղեկավարները, Հանրային խորհրդի անդամները, գործող ավագանու կազմը, ԵԿՄ ներկայացուցիչները, «Ազատամարտ» կոմիտեի ներկայացուցիչները, մեզ մոտ ոչ ֆորմալ կառույց կա, որը կոչվում է «վաշտ», Կապանում կազմավորված մեր առաջին ռազմական ստորաբաժանման տղաներն են դրանում ընդգրկված և մարդկանց, ովքեր ցանկություն են հայտնել այս հարցի քննարկմանը մասնակցել։ Խորհրդի նիստից հետո մենք որոշում կկայացնենք արտահերթ նիստ հրավիրելու հարցը և օրակարգը»,-տեղեկացրեց Աշոտ Հայրապետյանը և հավելեց՝ նիստը տեղի է ունենալու ժամը 17։00-ին։
Մանվել Գրիգորյանին Կապանի պատվավոր քաղաքացու կոչումից զրկելու հարցի վերաբերյալ, Աշոտ Հայրապետյանի՝ որպես համայնքի ղեկավար և պարզապես քաղաքացի, կարծիքը տարբեր է։ «Որպես քաղաքացի ասեմ՝ սա մեր զգայարանները տակնուվրա անող դեպք էր։ իսկ որպես համայնքի ղեկավար նշեմ, որ պատվավոր քաղաքացու կոչում շնորհվում և զրկվում է ավագանու որոշմամբ, ոչ թե համայնքի ղեկավարի։ Այնուամենայնիվ, հարցը քննարկելու անհրաժեշտություն կա և այդ առաջարկը ես ընդունել եմ։ Կյանքը ցույց է տվել, որ նման հարցերի վերաբ երյալ գնահատականներ տալիս են հաջորդ սերունդները։ Ես միշտ եղել եմ այն կարծիքին, որ մարդիկ, ովքեր ապրում են նույն ժամանակում, գործում են, աշխատում են, չեն կարող լինել օբյեկտիվ և նման գնահատականներ պետք է տան հաջորդ սերունդները։ Իսկ որպես քաղաքացի այս ամենն ինձ համար առնվազն զազրելի էր։ Այստեղ խնդիրը կոչումից զրկելը չի։ Դա մի որոշում է, որը չգիտեմ ինչ-որ բան կտա՞ Մանվել Գրիգորյանին կամ նար ընտանիքի անդամներին։ Երեկ մեր քննարկման ժամանակ ես ավագանու անդամների ուշադրությունը հրավիրեցի հետևյալ հանգամանքի վրա՝ կոչումներ շնորհելիս պետք է կարևորվեն, ոչ թե ինչ-որ ժամանականեր անց փորձեն սխալներ ուղղեն։ Խոսքը չէր վերաբերում Մանվել Գրիգորյանի հարցին, այլ՝ առհասարակ բոլոր հարցերում։ Նման հարցերում պետք է լինել շատ զգուշ, որպեսզի չստեղծենք խնդիրներ մեզնից հետո եկած մարդկան ց համար»,- իր խոսքը ամփոփեց Կապանի քաղաքապետ Աշոտ Հայրապետյանը։
Նշենք, որ Կապանն ունի թվով 45 պատվավոր քաղաքացի, այդ թվում ՀՀ վարչապետ Անդրանիկ Մարգարյանը։ Ի դեպ՝ Անդրանիկ Մարգարյանին և Մանվել Գրիգորյանին 2003 թվականին է շնորհվել Կապանի պատվավոր քաղաքացու կոչում։