Աշխարհ
ԱՄՆ-ն հրահրել է պատմության մեջ խոշորագույն առևտրային պատերազմը. Չինաստան
Պաշտոնական Պեկինը մեղադրել է Վաշինգտոնին համաշխարհային տնտեսության պատմության մեջ խոշորագույն առևտրային պատերազմը հրահրելու համար՝ տեղեկանալով, որ ԱՄՆ-ն Չինաստանից ներկրվող ապրանքների համար սահմանել է 34 մլրդ դոլարի մաքսատուրք:
Ինչպես նշում է Al Arabiya-ն, Չինաստանը Միացյալ Նահանգներին մեղադրել է Առևտրի համաշխարհային կազմակերպության կանոնները խախտելու համար:
«Միացյալ Նահանգները խախտել է ԱՀԿ-ի կանոններն ու համաշխարհային տնտեսության պատմության մեջ հրահրել խոշորագույն առևտրային պատերազմ: Այս տիպի մաքսատուրքերը տիպիկ առևտրային խուլիգանություն են ու իրապես վնասում են համաշխարհային արդյունաբերական և գնային շղթաների անվտանգությանը»,-հայտարարել է Չինաստանի առևտրի նախարարությունը:
Չինաստանը նաև հայտարարել է, որ արդեն պատասխան մաքսատուրքեր է սահմանել Միացյալ Նահանգներից ներկրվող ապրանքների համար:
Աղբյուրը մանրամասնում է, որ չինական կողմի մաքսատուրքերը դոլար առ դոլար համապատասխանում են ԱՄՆ-ի սահմանած մաքսատուրքերին:
Նախարարության խոսնակն ընդգծել է, որ առևտրային պատերազմը վերջին բանն է, որ Չինաստանը կցանկանար որպես իրականություն տեսնել:
Հիշեցնենք, որ ավելի վաղ Թրամփը սպառնացել էր չինական ապրանքների ներկրման համար սահմանված մաքսատուրքերի չափը հասցնել 145 մլրդ դոլարի:
Աղբյուր՝ tert.am