Համի արվեստը

Երևանի կոնյակի գործարանի նախաձեռնությամբ «Արարատ. բացահայտումներ» խորագրով ճանաչողական միջոցառումների շարք է կազմակերպվել հանրապետությունում և նրա սահմաններից դուրս: Նպատակը սպառողներին հայկական կոնյակագործության նրբությունները ներկայացնելն է: Հերթականը տեղի ունեցավ Կապանի «Արարատ» ռեստորանային  համալիրում:

Կոնյակագործության մեկնարկը

Ամեն բան սկսվեց 1887-ին, երբ գործարար Ներսես Թաիրյանը առաջին անգամ իր գործարանում ներդրեց սպիրտի թորման այժմ արդեն դասական դարձած տեխնոլոգիան: Արարատյան դաշտի շահավետ պայմանները և տեղական խաղողի բարձր որակը անտարբեր չթողեցին նրան: Ձեռք բերեց թորման նոր սարքեր, և այդպիսով սկիզբ դրվեց կոնյակագործությանը: 1899թ. ձեռնարկությունը վաճառվեց «Շուստով և որդիներ» ռուսական ընկերությանը, որը աշխատանքի ընդունեց բարձրակարգ տեխնոլոգների: Մկրտիչ Մուսինյանցը հենց այդ մասնագետներից էր, ով մի շարք բաղադրատոմսերի հեղինակն է: Նրա «Ֆին-Շամպայն Ընտիր» կոնյակը Շուստովներին Գրան պրի բերեց, ինչպես նաև ստացավ «Նորին Կայսերական Գերազանցության պալատի մատակարար» կոչումը: Իսկ Խորհրդային Միության տարիներին կոնյակագործության մեջ մեծ էր մասնագետ Մարգար Սեդրակյանի՝ վարպետաց վարպետի դերը: Նա է «Ախթամար», «Նաիրի», «Դվին» կոնյակների հեղինակը: 1998թ.-ից Երևանի կոնյակի գործարանը աշխարհի ալկոհոլային խոշոր ընկերության՝  Pernod Ricard խմբի անդամ է:

Համային նրբություններ

Կոնյակի հումքը խաղողն է, գործարանը համագործակցում է երեք հազարից ավելի խաղողագործների հետ, բայց առանձնացնում է հենց Արարատյան դաշտում ծնունդ առնող խաղողի տեսակները: Ապրանքանիշի դեսպան Լուսինե Թորոյանը նշում է՝ Արարատյան դաշտավայրը ամենաբերրի հողն ունի, այնտեղ աճում են կոնյակի համար հարմար խաղողի տեսակներ:

Քանի որ հնեցման շնորհիվ է կոնյակը ձեռք բերում գույն, բույր, համ, հետևաբար կարևոր է, թե ինչից են պատրաստում տակառները: Ունեն արտադրամաս, որտեղ կաղնուց տակառներ են պատրաստում. կաղնին է, որ իր մեջ պարունակում է ուրույն հատկություններ կոնյակի սպիրտի համար: «Մեր վարպետների խոսքով՝ յուրաքանչյուր տակառ ունի բնավորության իր գիծը. որոշները մեղմ են, որոշներն՝ առավել փափուկ, կան նաև ակտիվ տակառներ: Դրանք մեզ ծառայում են միջինը 80 տարի», - ասում է Լ․Թորոյանը։

«Կոնյակ ճաշակելու համար պետք է կակաչաձև բաժակ: Այն տաքացնում են ձախ ափի մեջ ՝ասում են սրտին  մոտ, որպեսզի հավելյալ ալկոհոլը գոլորշիանա», - ասաց ապրանքանիշի դեսպանը՝ ավելացնելով, որ կոնյակի որակի մասին դատում են երեք չափանիշով՝ գույն, թափանցիկություն, թանձրություն: Որքան կոնյակը հնեցված է, այնքան մուգ ու հագեցած է, որքան պատանի՝ այնքան բաց գույնի:

Կոնյակը ճաշակում են դանդաղ՝ կում-կում, դա համի զգացողության արվեստ է, ավանդույթի համաձայն՝ ըմպում են սառը դեղձի, չրերի կամ ընդեղենի ընկերակցությամբ:

«Արարատ» մակնիշի կոնյակը հնարավորություն է տալիս նաև հիանալի կոկտեյլներ պատրաստել։ Բարմեն Սպարտակ Աբրահամյանը նշեց, որ սիրով է աշխատում այս կոնյակի հետ. «Աշխատանքը «Արարատի» հետ հեշտ է ու հաճելի, քանի որ նրա շնորհիվ հնարավոր է համադրել ամենատարբեր մրգերն ու հատապտուղները»:

Նշենք, որ նման միջոցառումներ կկազմակերպվեն Արցախում, իսկ հաճախորդին գոհացնելու համար նոր ուղիների որոնումը չի դադարում:

Անուշ Միրզոյան