Սյունիք
Քննարկում պլաստիկից շինարարական նյութերի ստացման ծրագրի վերաբերյալ
Նոյեմբերի 7-ին Կապան համայնքի ղեկավար Գևորգ Փարսյանը հյուրընկալեց «Ուրբան» հիմնադրամի խորհրդի անդամ Հայաստան Ստեփանյանին: Հանդիպմանը քննարկվեց «Բնապահպանական մարտահրավերների վերածումը հնարավորությունների. պլաստիկ թափոններից շինարարական նյութերի ստացում» ծրագիրը, որը համայնքապետարանը իրականացնում է «Ուրբան» հիմնադրամի և ևս երկու գործընկեր կազմակերպությունների հետ համատեղ: Քննարկմանը ներկա էր նաև Կապանի համայնքապետարանի ծրագրային թիմի ղեկավար Նորայր Հարությունյանը: Ծրագրային թիմի ներկայացուցիչները համայնքի ղեկավարին ներկայացրեցին Սյունիքի և Վայոց ձորի մարզերի քաղաքային բնակավայրերում մինչ այժմ կատարված աշխատանքները:
Նոյեմբերի 8-ին համայնքի ղեկավարը և ծրագրային թիմի ներկայացուցիչները այցելեցին շինարարական նյութերի ստացման համար առանձնացված տարածք՝ տեղում ծանոթանալու պլաստիկի մամլման, ինչպես նաև հոսքագծի տեղադրման համար տարածքի նախապատրաստական աշխատանքներին:
Այնուհետև, ծրագրային թիմը մեկնեց Մեղրի համայնք՝ մամլիչի տեղադրման տեխնիկական խնդիրները լուծելու և աշխատանքային որոշ հարցեր քննարկելու նպատակով:
Հիշեցնենք, որ ծրագիրը ֆինանսավորվում է Եվրամիության, ՀՀ կառավարության ու 4 գործընկեր կազմակերպությունների կողմից և իրականացվում է Սյունիքի և Վայոց ձորի մարզերի քաղաքային բնակավայրերում:
Կապանի համայնքապետարանի ֆեյսբուքյան էջից